Stad skipstunell
Stad skipstunell er verkelegheit på Høgskolen i Ålesund.
Skipstunellen er verkelegheit på Høgskolen i Ålesund, og det er ingen problem å vise Kystdirektoratet at det går an å treffe tunellåpninga. Velkommen til simulatorsenteret, seier Professor Norvald Kjerstad.
Utreiing nummer 18
Stad skipstunell er for tida gjennom utreiing nummer 18, etter at fiskeri- og kystminister Lisbeth Berg-Hansen var usikker på om fartøya ville klare å treffe tunellåpninga i dårlig ver. Sunnmørsposten skreiv 10.10.2011 om sjøfolk og politikarar som var provosert over utsegnet, og meinte dette var trenering av prosjektet.
Skipstunellen er på simulator
Professor Norvald Kjerstad er leiar for simulatorsenteret ved Høgskolen i Ålesund, og fortel at skipstunellen er laga på simulator her.
Stortingspolitkar Svein Gjelseth (AP) frå Hærøy har testa denne, og inviterte Kystverket til å besøke Høgskolen gjennom en artikkel i Sunnmørsposten 10.10.2011. Dei kan trygt komme, svarer Kjerstad på dette. Vi kan vise at navigering i forhold til tunellåpninga er uproblematisk. Dette byggjer dessutan på grunnleggande maritim kunnskap som Kystverket burde kjenne til når dei har gjort utreiingar.
Bilde: Professor Norvald Kjerstad
Mange smale passasjer
Ein skal følge vanlege retningslinjer for sikkerheit over alt på sjøen, og då er det ikkje forbunde nokon større risiko med tunellen enn andre smale passasjer langs kysten, seier Kjerstad. Han nemner blant anna moljegapet ved Ålesund som eksempel på ein smal passasje. I tillegg er ikkje fartøya eksponert for dårlig ver inne i tunellen, men kan seile gjennom i rolig sjø.
Naturtru simulator
Simulatorane ved Høgskolen i Ålesund er svært naturtru. Kjerstad fortel at det i programma lagast ein terrengmodell på bakgrunn av innsamla data i ein kartdatabase. Både terrenget på land og bunntopografi i havet leggast inn i programmet. I tillegg kan alle slags ver- og føremessige forhold takast med.
Fakta om Stad skipstunell
Traseen for Stad skipstunnel går mellom Moldefjorden og Kjødepollen i Selje kommune. Slik skal båtane sleppe å gå rundt det verutsette Stad. Ein liten båt kjem gjennom den 1700 meter lange tunellen på rundt 5 minutt, trur Kjerstad. Store båtar som Hurtigruta vil bruke noko lengre tid, kanskje rundt 15 minutt. I dag bruker Hurtigruta omkring 2 tima i det tøffe farvatnet rundt Stad.
Cruisekai på Hellesylt
Høgskolen i Ålesund har erfaring med å teste ut prosjekt på simulator før dei blir realisert. På førehand var Stranda kommune usikre på om det var mogleg for store cruiseskip å legge til på ei ny kai som var under planlegging på Hellesylt. Høgskolen i Ålesund fekk då i oppdrag frå kommuna å teste kaia på simulator. Testane viste at det gjekk fint for store skip å legge til, og anlegget skal no stå ferdig til cruisesesongen i 2012.
